MENU

АЯЛАЛ ЖУУЛЧЛАЛЫН САЛБАР ДАХЬ ТЭЭВРИЙН ҮЙЛЧИЛГЭЭНИЙ НӨХЦӨЛ БАЙДАЛ, ТУЛГАМДАЖ БУЙ АСУУДЛЫГ ХЭЛЭЛЦЭВ

2024/09/06

Монгол Улсын Засгийн газраас 2023-2025 оныг “Монголд зочлох жил” болгон зарласан. Энэ хүрээнд манай улс үзэсгэлэнт байгаль, уламжлалт нүүдлийн соёлыг дэлхийд таниулах, Монгол Улсын эдийн засгийг солонгоруулах бодлого барьж буй.
Монголд эдийн засгийн бүтцийг тодорхойлох үндсэн салбаруудад аялал жуулчлал, тээвэр ложистикийн салбар чухал үүрэгтэй. Учир нь, “Монголд зочлох жил”-ийн хүрээнд манай улс 2024 онд 1 сая, 2030 онд 2 сая жуулчин хүлээн авах зорилтыг дэвшүүлэн ажиллаж байна. Үүнд, тээврийн салбарын үйлчилгээ чухал үүрэг гүйцэтгэнэ.
Тиймээс Зам, тээврийн яам болон Аялал жуулчлалын мэргэжлийн холбооны зүгээс санаачлан “Монгол Улсын аялал жуулчлалын салбар дахь тээврийн үйлчилгээний өнөөгийн нөхцөл байдал, цаашид авч хэрэгжүүлэх арга хэмжээ” сэдэвт хэлэлцүүлгийг энэ сарын 4-нд ЗТЯ-ны хурлын танхимд зохион байгууллаа.
Хэлэлцүүлэгт Зам, тээврийн яам, Соёл, спорт, аялал жуулчлал, залуучуудын яам, Иргэний нисэхийн ерөнхий газар, “МИАТ” ТӨХК, Улаанбаатар төмөр зам ХНН, Авто тээврийн үндэсний төв ТӨҮГ, “Чингис хаан” олон улсын нисэх буудлын менежментийг хэрэгжүүлэгч “НУБИЭ” ХХК, “Хүннү Эйр” ХХК, “Изинис Эйрвэйз” ХХК, “Аэромонголиа” ХХК, “Гэбэт” ХХК, “Рийм Хайнзан” ХХК, Аялал жуулчлалын мэргэжлийн холбоо, “Монголын агаарын тээвэрлэгчдийн холбоо” ТББ, “Монголын олон улсын агаарын тээврийн гишүүн агентуудын холбоо” ТББ-ын төлөөллүүд оролцсон юм.
Зам, тээврийн яамны Төрийн нарийн бичгийн дарга С.Батболд хэлэлцүүлгийг нээж хэлсэн үгэндээ аялал жуулчлалыг хөгжүүлэхэд зам тээврийн салбар, тэр дундаа тээврийн үйлчилгээ чухал үүрэгтэйг онцлоод зам тээврийн салбарт хэрэгжиж буй төсөл хөтөлбөрүүд, цаашид хэрэгжүүлэхээр төлөвлөж буй ажлуудаа танилцууллаа.
Мөн Аялал жуулчлалын мэргэжлийн холбооны зүгээс дэвшүүлж буй аялал жуулчлалын бодлого, зорилтыг хэрэгжүүлэхэд зам, тээврийн салбарын зүгээс шаардлагатай арга хэмжээг тодорхойлж, тэдгээрийг шийдвэрлэж, хамтран ажиллахаа илэрхийлсэн юм.
Хэлэлцүүлгийн үеэр оролцогч байгууллагууд агаарын тээвэр, төмөр замын тээвэр, авто замын тээврийн 2023, 2024 оны тээвэрлэлтийн мэдээллийг танилцуулж, өнөөдрийн түвшнээ үнэлж дүгнэн, цаашид хийж хэрэгжүүлэх ажлуудаа хэлэлцэх, тулгамдаж буй асуудлуудыг хэрхэн шийдвэрлэх талаар санал солилцлоо.
Хэлэлцүүлгийн төгсгөлд оролцогч байгууллагууд цаашид өөрсдийн хариуцсан чиглэл тус бүрээр Аялал жуулчлалын мэргэжлийн холбоотой хамтран ажиллаж, ажил мэргэжлийн онцлогт тохирсон үйлчилгээ, маркетингийн сургалт авах, аялал жуулчлалын салбарыг хөгжүүлэх, тээврийн үйлчилгээг сайжруулах чиглэлд хэрэгцээтэй мэдээллийг шуурхай солилцож, хамтран ажиллахаар тохиролцов.





Холбоотой мэдээ

ИНЕГ-ЫН УДИРДЛАГУУД "ROC AVIATION" КОМПАНИЙН МЭРГЭЖИЛТНҮҮДИЙГ ХҮЛЭЭН АВЧ УУЛЗЛАА
2024/09/10

Нисэх буудлын чиглэлээр зөвлөх үйлчилгээ үзүүлдэг БНХАУ-ын “ROC Aviation” компанийн мэргэжилтнүүдийг ИНЕГ-ын дарга, удирдлагууд хүлээн авч уулзлаа. “ROC Aviation” компанийн төлөөлөл 2024 оны 09 дүгээр сарын 15-ны өдрийг хүртэл манай улсад ажиллах юм.

ХАСХОМ ГАРГАХ ҮҮРЭГ БҮХИЙ АЛБАН ТУШААЛТНУУДЫН АНХААРАЛД
2024/01/03

Хувийн ашиг сонирхлын мэдүүлэг болон хөрөнгө, орлогын мэдүүлэг гаргах үүрэг бүхий албан тушаалд ажиллаж байгаа албан тушаалтан Та энэ оны 02 дугаар сарын 09-ний дотор 2023 оны ХАСХОМ-оо гаргана уу. 

МОНГОЛЫН БОЛОН ОЛОН УЛСЫН НИЙТ 20 МЭРГЭЖИЛТЭН ИРГЭНИЙ НИСЭХИЙН АЮУЛГҮЙ БАЙДЛЫН ЗААВАРЛАГЧ БЭЛТГЭХ СУРГАЛТАД АМЖИЛТТАЙ ХАМРАГДЛАА
2024/04/12

Иргэний нисэхийн ерөнхий газар нь Ази, Номхон далайн бүсийн Иргэний нисэхийн аюулгүй байдлын хамтын ажиллагааны хөтөлбөрийн гишүүн ба тус хөтөлбөрийн Удирдах зөвлөлийн даргын үүргийг 2023-2024 онуудад гүйцэтгэж байгаа. Уг хөтөлбөрийн 2024 оны төлөвлөгөөнд “Олон улсын иргэний нисэхийн байгууллага (ICAO)-ын Иргэний нисэхийн аюулгүй байдлын зааварлагч” бэлтгэх олон улсын сургалтыг Монгол улсад зохион байгуулахаар тусгагдаж батлагдсаны дагуу сургалтыг 2024 оны 04 дүгээр сарын 08-ны өдрөөс эхлэн 5 хоног The Corporate Hotel & Convention Centre-д амжилттай зохион байгуулж дууслаа. Уг сургалтыг ИНҮТ-ийн харьяа НСТ нь хариуцан зохион байгуулсан бөгөөд Ази, Номхон далайн бүс нутгуудаас гадаадын суралцагч нар ирж хамрагдлаа. Тухайлбал, Бүгд Найрамдах Социалист Вьетнам Улс, Тайландын Хаант Улс, Бүгд Найрамдах Энэтхэг Улс, Бүгд Найрамдах Филиппин Улс, Камбожийн Хаант Улс, Холбооны Бүгд Найрамдах Ардчилсан Балба Улс буюу нийт 6 улсаас Иргэний нисэхийн ерөнхий газар, Тээврийн аюулгүй байдлын газар, Иргэний нисэхийн академи зэрэг байгууллагуудын аюулгүй байдал хариуцсан 10 мэргэжилтэн, ИНҮТ-ийн Нисэхийн аюулгүй байдал, хамгаалалтын алба, Нисэхийн сургалтын төв болон “Нью Улаанбаатар Интернэйшнл Эйрпорт” ХХК, “Хүннү Эйр”ХХК, “Изинес Эйрвэйз”ХХК-ийн 10, нийтдээ 20 мэргэжилтэн хамрагдаж, амжилттай төгсөн гэрчилгээжиж, иргэний нисэхийн аюулгүй байдлын зааварлагчид болон бэлтгэгдлээ. Уг сургалт нь ICAO-ийн стандартчилагдсан сургалтын багц хөтөлбөр боловсруулах арга зүйгээр боловсруулагдаж баталгаажсан бөгөөд суралцагч нарт нисэхийн аюулгүй байдлын сэдвээр сургалтыг хэрхэн чанартай явуулах, заах арга зүйн ур чадварыг олон улсын түвшинд хүргэн хэрхэн хичээлийг зааж сургах зэрэг онолын болон практик дадлагыг олгосон өндөр ач холбогдолтой сургалт болж өндөрлөлөө.   Цаашид, ICAO-ийн нэгдсэн нэг стандарт шаардлагаар боловсруулагдаж, батлагдсан олон улсын түвшний сургалтуудыг эх орондоо зохион байгуулж, ICAO-аас гэрчилгээжүүлэн, иргэний нисэхийн салбарын хүний нөөцийг бага зардлаар сургаж, бэлтгэх томоохон зорилгыг хэрэгжүүлэхээр ИНЕГ болон ИНҮТ-ийн хамт олон зорин ажиллаж байна.