Иргэний нисэхийн үндэсний төвийн харьяа салбар, нэгжийн 2023 оны тайлангийн хурал үргэлжилж байна. Аж ахуйн үйлчилгээ, дулаан сантехникийн алба үндсэн 64, гэрээт 38 ажилтантайгаар үйл ажиллагаагаа явуулдаг. Тус алба нь цэвэрлэгээ үйлчилгээ, гадна тохижилт, барилга захиалагчийн хяналт, барилга засвар, аюулгүй байдлын хамгаалалт, ариутгал, халдваргүйтгэл, мэрэгчгүйтгэл чиглэлүүдээр үйл ажиллагаагаа явуулж байна. Мөн ИНЕГ, ИНҮТ болон тэдгээрийн харьяа нийт 27 барилга байгууламжийн дулаан сантехник, агааржуулалт салхивч, хөргөлтийн систем, инженерийн шугам сүлжээ, тоног төхөөрөмжүүдийн тасралтгүй, хэвийн ажиллагааг хангаж, ашиглалт үйлчилгээг 24 цагаар хариуцан ажилладаг. 2023 оны жилийн эцсийн байдлаар IMCAA- гаар 99, утсаар 115 нийт 214 дуудлагыг барагдуулжээ. Тус алба нь 2023 онд нийт 26 ажил төлөвлөж одоогийн байдлаар гүйцэтгэлийн хэрэгжилт нь 98,4%-тай байна. Цаашид тус албанаас хариуцан ажиллах ажлын цар хүрээ, обьектын тоо нэмэгдэж байгаатай холбоотойгоор орон тоо нэмэгдүүлэх, агааржуулалтын болон хөргөлтийн системийн тоног төхөөрөмжүүдийг хэсэгчлэн шинэчлэх, ажлын хэрэгцээнд жижиг оврын эксковатор худалдан авах, ААБЗХ-т зориулалтын суурин тоног төхөөрөмжийг суурилуулж захиалгат болон төлбөртэй засвар үйлчилгээг хийх, ДСАХ-ийн үндсэн чиг үүргийн хүрээнд төлбөртэй ажил үйлчилгээ үзүүлэх шаардлагатай байгаа талаараа тайлангийнхаа төгсгөлд хэллээ.

УИХ-ын Хууль зүйн байнгын хорооны 2024 оны 04 дүгээр сарын 02-ны өдрийн 05-р тогтоолоор журам, маягт, жагсаалтыг шинэчлэн баталлаа.Уг тогтоолоор Авлигын эсрэг хууль, тогтоомжийн дагуу албан тушаалтнаас гаргах мэдүүлэг, мэдэгдэл, тайлбарыг бүртгэх, хянах, хадгалах үйл ажиллагаа, мөн мэдүүлэг, мэдэгдэл, тайлбарын маягт, мэдүүлэг гаргах албан тушаалтны жагсаалтыг шинэчлэн баталсан.    Тогтоол нь 10 хавсралттай байна. Дэлгэрэнгүй мэдээллийг АТГ-ын вэбсайтаар нэвтэрч үзнэ үү.https://iaac.mn/post/155570 

Улс орны хэмжээнд нүүрлэсэн зудын эрсдэлийг бууруулахад хувь нэмэр оруулж, хүнд хэцүү цаг үеийг даван туулж буй малчин түмэндээ сэтгэлийн дэм өгөх зорилгоор Иргэний нисэхийн ерөнхий газраас "Малчдадаа туслах сайн дурын хандивын аян"-ыг эхлүүлсэн. Иргэний нисэхийн ахмадууд энэхүү аянд нэгдэж байна. Тодруулбал, Иргэний нисэхийн Ахмадын хорооны дэргэдэх Газрын тусгай үйлчилгээний албаны ахмадын зөвлөлөөс 1 сая 520 мянган төгрөгийн хандив өргөснийг Ахмадын хэсгийн дарга Б.Бадам, Гавьяат тээвэрчин С.Лоосов, ахмад настан Д.Баярхүү нар ИНЕГ-ын дарга Ч.Мөнхтуяад  гардуулан өглөө. Халуун сэтгэлт ахмадуудаас ирүүлсэн хандивыг зудын хүнд нөхцөлийг даван туулж байгаа малчдад  дамжуулан хүргэх болно. Хандивын аянд нэгдэж, сэтгэлийн дэм өгсөн ахмадууддаа эрүүл энх, сайн сайхан бүхнийг хүсэн ерөөе. Байгалийн давагдашгүй хүчин зүйлтэй нүүр тулж буй малчин түмэндээ сэтгэлийн дэм өгч, хандивын аянд нэгдэхийг Иргэний нисэхийн ерөнхий газар, Иргэний нисэхийн үндэсний төвийн нийт хамт олон та бүхэндээ уриалж байна.