ИНҮТ-ийн Хамтын ажиллагааны газраас зохион байгуулдаг ээлжит “Мэдээллийн цаг” өнөөдөр боллоо. Энэ удаагийн “Мэдээллийн цаг”-ийн зочноор Монгол Улсын Шадар сайдын ахалсан “Mars-V” төслийн менежер Д.Энхтүвшин, Модуль хөгжүүлэлтийн багийн ахлагч З.Дөлсайхан нар оролцож, тус төслийн талаар ИНЕГ-ын дарга, удирдлагууд болон харьяа газар нэгжийн ажилтнуудад танилцууллаа. Монголын сансрын судалгаа хөгжүүлэлтийн төвийн хэрэгжүүлж буй “Mars-V” төсөл нь Монголын говьд: 1.      Марс гараг дээр амьдрахад шаардлагатай ур чадварыг нутагшуулах, техниктэй ажиллах мэдлэг олж авах, туршлага хуримтлуулах, багийн ажиллагаа болон амьдрах чадвараа нэмэгдүүлэх сургалтын төв байгуулах; 2.      Марс гарагийг судлах технологиудыг төсөөтэй орчинд судлах, хамтарсан судалгаа хийх, олон улсын оролцоо бүхий шинжлэх ухааны судалгааны төв бий болгох; 3.      Марсын амьдрах орчныг хамгийн төсөөт орчинд нь мэдэрч, Марс явах хүмүүсийг бэлтгэдэг хөтөлбөрөөр өөрийгөө сорьж үзэхийг хүссэн аялагчдад зориулсан тусгай сонирхлын аялал жуулчлалын хөтөлбөр бүхий төв байгуулах үндсэн зорилготой байна. Өөрөөр хэлбэл, Марс гарагт судалгаа хийх багийг бэлтгэх сургалтын төвийг байгуулж, сансрын технологийн хөгжлийг Монголд нутагшуулахаас гадна сансрын мэдрэмж, туршлага авахыг хүссэн сонирхогчдод зориулсан тусгай сонирхлын аялал жуулчлалыг Монгол орны зарим бүс нутагт хөгжүүлэх зорилготой төсөл юм. Монголын говийн цаг уур, хөрс, орчин нөхцөл Марс гараг дээрхтэй төстэй учраас сансар огторгуйд аялах боломж зөвхөн сансрын нисгэгчид бус, хүн бүрд нээлттэй байх боломжтой гэдгээрээ онцлог байна. Эхний ээлжид төслийн суурь баазыг Өмнөговь аймагт байгуулж,  сургалтын хөтөлбөрөө Дундговь аймагт хэрэгжүүлэхээр төлөвлөж байгааг хэллээ. “MARS-V” төслийн үйл ажиллагааг дэмжин ажиллах ажлын хэсэгт ИНЕГ-ын дарга гишүүнээр ажиллаж байгаа. Мэдээллийн цагийн төгсгөлд “MARS-V” төслийн багийн зүгээс төслийг хэрэгжүүлэхэд Иргэний нисэхийн ерөнхий газартай хамтран ажиллах хүсэлтэй байгаагаа илэрхийллээ.  

Иргэний нисэхийн ерөнхий газар, түүний харьяа салбар нэгжийн ажилтнуудыг мэргэжлийн ур чадвар болон хувь хүний түвшинд сурч хөгжихөд дэмжлэг үзүүлэх, байнга сурч хөгжих хүсэл эрмэлзлийг нэмэгдүүлэх, ажилтнуудын залгамж халааг бэлтгэх болон байгууллагын дотоод соёл, эерэг хандлагыг бий болгох зорилгоор ИНЕГ-ын даргын тушаалаар Иргэний нисэхийн ерөнхий газар, Иргэний нисэхийн үндэсний төв, түүний харьяа салбар нэгжийн хэмжээнд “Менторшип-2024” хөтөлбөрийг хэрэгжүүлж байна. Хөтөлбөрт хамрагдах хүсэлтэй ажилтнуудыг бүртгэж, ажил мэргэжлийн чиг хандлага, дадлага туршлага зэрэг хөтөлбөрт тавигдсан шаардлагуудын дагуу шалгаруулж, нийт 20 ажилтан буюу 10 ментор /чиглүүлэгч/, 10 ментийг /суралцагч/ сонгоод байгаа юм. Хөтөлбөрт оролцогч менторууд нь өөрийн хариуцсан ментийгийн ур чадвар, сонирхол, ямар чиглэлээр сурч хөгжихийг хүсэж байгаа зэргийг тодорхойлсны үндсэн дээр цаашдын зорилгоо тодорхойлоход нь туслаж, нөөц бололцоогоор ханган, зааж зөвлөнө. Мөн хөтөлбөрийн хугацаанд хэрхэн хөгжиж, ахиц өөрчлөлт гарч байгааг үнэлэх юм. Өнөөдөр “Менторшип-2024” хөтөлбөрийн нээлт болж, ИНЕГ-ын дарга Ч.Мөнхтуяа, Бодлогын хэрэгэжилтийн хэлтсийн дарга Ч.Одгэрэл, ЗУХЭЗХ-ийн дарга З.Туяа нар хөтөлбөрийн оролцогчидтой уулзаж, амжилт хүслээ. Тус хөтөлбөр 2024 оны 08 дугаар сар хүртэл үргэлжилнэ.

БНХАУ-ын Шанхай хотноо 2024 оны 11 дүгээр сарын 21-22-ны өдрүүдэд “Олон улсын агаарын тээврийн холболтыг нэмэгдүүлэх, “ногоон” нисэхийг хэрэгжүүлэх” уриан дор, улс хооронд иргэний нисэхийн зохицуулалт, стандартуудын нийцэл уялдаа холбоог дэмжих, иргэний нисэхийн тогтвортой хөгжлийн өмнө тулгарч буй сорилтуудад хариулт олох зорилготой Олон улсын иргэний нисэхийн форум “International Civil Aviation Forum ICAF” форум анх зохион байгуулагдаж, ИНЕГ-аас томилогдсон төлөөлөл оролцлоо.Тус арга хэмжээг БНХАУ-ын агаарын хөлөг үйлдвэрлэгч “Commercial Aircraft Corporation of China Ltd. - СОМАС” компани, Олон Улсын Иргэний Нисэхийн Институт “Institute of International Civil Aviation-IICA” болон Шанхай хотын “SHANGHAI JIA TONG UNIVERSITY” Их Сургууль хамтран зохион байгуулж, форумыг Олон улсын иргэний нисэхийн байгууллагын Ерөнхий нарийн бичгийн дарга асан доктор Фан Лиу удирдсан байна. Нисэхийн ногоон хөгжлийн төлөөх зорилгод Засгийн газрууд, Олон улсын байгууллагууд, компани болон шинжлэх ухаан судалгааны байгууллагуудын хамтын хүчин зүтгэлээр хүрэх тул энэхүү форумд дээрх чиглэлийн төлөөлөл бүр оролцож зохион байгуулагдсан нь онцлог байлаа.Агаарын тээврийн товчооны дарга ноён Мохамед Халифа Рахма, Shanghai Jia Tong Их сургуулийн Нүүрс төрөгчийн саармаг хөгжлийн институтийн декан, БНХАУ-ын Инженерчлэлийн Академийн академич ноён Huang Zhen “Safe sky and sustainable future”, “Green fuel technology and Carbon Neutrality” сэдвээр тус тус илтгэл тавьсан бөгөөд Олон улсын иргэний нисэхийн байгууллагын тоон мэдээгээр дэлхий нийтийн агаарын тээвэр цаашид жилд 4,3% хувиар өсч, агаарын тээврийн эрэлт хэрэгцээ нэмэгдэж байгаагийн зэрэгцээ НҮБ-ын Тогтвортой хөгжлийн зорилтууд 2030-г хангаж агаарын тээврийн салбарын нүүрс хүчлийн ялгарлыг бууруулах, ногоон өөрчлөлтийг хэрэгжүүлэх томоохон зорилгыг хэрэгжүүлэхээр ажиллаж байна.Түүнчлэн, дэлхийн улс орнуудын эдийн засгийн болон иргэний нисэхийн дэд бүтцийн хөгжлийн эрс тэс ялгаатай байдал, улс орнуудын олон улсын иргэний нисэхийн стандартын ойлголт, түүний хэрэгжилтийн зөрүүтэй байдлыг арилгаж агаарын тээврийн холболтыг нэмэгдүүлэх чиглэлд форумд оролцогч олон улсын байгууллага, Засгийн газрууд, иргэний нисэх, агаарын тээврийн байгууллагууд болон шинжлэх ухаан эрдэм шинжилгээний байгууллагуудын төлөөллүүд оролцож, одоогийн нөхцөл байдал,  цаашид хэрэгжүүлэх арга зам, чиглэлийн талаар хэлэлцсэн.Форумд, Монгол Улс агаарын тээврийг хөгжүүлэх талаар, агаарын тээвэрлэгчдэд эдийн засгийн хэмнэлттэй үйл ажиллагаа явуулахад үзүүлж байгаа дэмжлэг, цаашид  “ногоон” хөгжлийг дэмжиж хэрэгжүүлэх салбарын нүүрс хүчлийн ялгарлыг тоолох, ОУИНБ-ын CORSIA хөтөлбөрийг хэрэгжүүлэх талаар мэдээлэл танилцуулж оролцлоо.